SWSchulV · Póstajenje wó šulskich kubłańskich nastupnosćach Serbow (Serbske šulske póstajenje – Sšp)
§ 7 Serbske šule z wósebnym charakterom Serbske šule z wósebnym charakterom (SWSchulV-253844)
Serbske šule mógu se organizěrowaś ako šule z wósebnym charakterom (specialne šule) pó § 8a Bramborskeje šulskeje kazni. Pśizwólenje za to dawa za šulu zagronity cłonk krajnego kněžaŕstwa. Wobźělenje na wucbje w pśedmjaśe serbšćina abo na wucbje serbšćina ako cuza rěc jo za wuknice a wuknikow winowatosć. W pśedmjatach, kótarež deje se póstajiś, ma se wuwucowaś w dolnoserbskej rěcy.
W serbskich specialnych šulach se dolnoserbska rěc wužywa zwenka wucby a z rosćecym rěcnym wuzamóžnjenim wuknicow a wuknikow w pśiběrajucej měrje ako wobchadna rěc w šuli. Pśedewšym wobzamknjenja ceptaŕskeje a šulskeje konference a wopowěsći deje se spisaś w nimskej a serbskej rěcy.
Na serbskich specialnych šulach deje se zasajźiś ceptaŕki a ceptarje, kótarež serbsku rěc derje wuměju. Jo-lic njejo to pśi pśistajenju a pśesajźenju zarucone, deje wóni trjebne rěcne znaśa w běgu tśich lět wót zachopjeńka źěła na jadnej specialnej šuli sebje pśiswójś a dopokazaś.